個唱讀致初戀男友情信 祖兒:你X唔X我啊?

Mon Mar 27 2017 02:58:18 GMT+0800 (HKT)

▲由於今次演唱會喺灣仔演藝學院舉行,所以個台好近,祖兒話:「可以見到大家表情同笑容。」

撰文︰《e+娛樂》

容祖兒14場《My secret live》演唱會灣仔演藝學院舉行,之前搞咗一場俾fans、一場俾贊助客戶,今晚係開放俾公眾嘅第一場,今晚睇騷嘅有謝霆鋒、楊受成夫婦、洪卓立、泳兒等,現場氣氛熱烈。

原來祖兒等呢個演唱會等咗7年,佢喺台上話:「今次演唱會嘅構思喺7年前,喺自己『Concert Number 6』 Ecnore位,好多fans點唱side track嘅歌,我唱唱吓就覺得,不如索性開個side track演唱會啦,點知一等就7年。」

祖兒又笑住話:「你哋唔好諗住嚟聽《我的驕傲》,今次會唱一啲大家比較少聽嘅冷門歌。如果你哋約咗朋友嚟唔係我fans,佢哋悶唔緊要,可以出去買支酒飲。」

祖兒除咗唱一啲大家比較少聽嘅冷門歌,仲會同fans講啲「真心話」。Joey自爆擇偶條年,「男朋友都唔會揀靚仔,反而鍾意啲有肉地,肉騰騰,淋淋地嗰啲。」在場有觀眾大嗌Eason,Joey聽到即刻話:「吓!佢係below average喎!」爆笑!

跟住祖兒讀出佢13歲寫俾初戀男友嘅情信,「93年3月16號,Dear乜乜乜,我啲字係唔係好靚呢⋯⋯點解我會X(愛)你,因為你可愛得意,可唔可以再乖啲啊?你可唔可以回信俾我啊?你X唔X我啊?」超搞笑!

▲祖兒自爆攞咗屋企隻大Miffy嚟做擺設,「嗰隻Miffy係屋企嘅『鎮店之寶』,仲有啲咕𠱸都係自己帶嚟。」

▲謝霆鋒都有嚟撐祖兒。

▲24號第一場係歌迷包場,阿sa 有嚟捧場,仲聲演大會開場白 。

▲第二場Yumiko 同愛女梁浸浸支持祖兒。