城中Top 3高級點心 帶阿媽去威

Fri May 11 2018 18:31:00 GMT+0800

撰文︰美食旅客

城中Top 3高級點心 帶阿媽去威

母親節先嚟識做孝子都好過毫無表示,做一日咁多乖仔乖女逗下媽媽開心吧!孝子賢孫首先要做嘅當然係晨早起身去攞位飲個茶啦~!推介城中3大高級粵菜餐廳,歎個優越頂級早茶,等媽咪率先有個開心嘅一天。

摩登中菜 紅糖

剛於去年開業於黃埔嘉里酒店之內嘅紅糖,裝修設計靈感源自60年代鄰近嘅紅磡灣船塢:紅磚牆、舊鐵閘、木氣窗勁有情懷。(紅磡紅鸞道38號香港嘉里酒店7樓∣2252 5279)

▲落地玻璃窗設計,令全店有8成座位都見到維港景。

▲仲有露天位,飲完茶同媽咪出去觀下海都好寫意。

▲必食一定係勁出名嘅一品燒鵝酥,咬開真係有一絲絲燒鵝肉,襯上由法國空運嚟嘅花,似一碟食得嘅天鵝湖。

▲松露野菌餃嘅菠菜汁水晶外皮晶瑩通透,將羊肚菌、雞肶菇、冬菇等雜菌炒香,混入意大利黑松露醬,菌香四溢。

▲楓糖黑豚肉叉燒入口鬆化,西班牙黑豚肉味濃又腍滑,師傅特地掃上楓糖,甜味輕巧。

米芝蓮星級粵菜 營致會館

開業僅僅3個月就於米芝蓮奪星,被評為一星嘅營致會館,係城中富商巨賈大banker飯局勝地。出名用料不惜功本,淨係食材已經佔咗成本三成。領軍大廚就係一直喺高級粵菜館掌廚有十幾年經驗嘅蕭顯志師傅。(中環干諾道中41 號盈置大廈地下G05、107至108∣2801 6882)

▲裝修由名師梁志天負責,以象徵富貴嘅翡翠色同金屬為主調,窗花設計成算盤模樣,一派富貴吉祥氣氛。

▲蕭顯志師傅本身亦出身自米芝蓮星級餐廳,由佢領軍果然有質素。

▲松露魚子龍蝦餃

▲金華筍尖鮮蝦餃