山竹又名夫妻果 打風打唔甩 卓韻芝結婚有巨星姊妹團

Sat Sep 15 2018 23:50:34 GMT+0800 (HKT)

▲「山竹」打到嚟,今晚掛3號波,卓韻芝同老公梁子賢喺中環外國記者會舉行婚禮。

撰文︰《八八通》

恭喜晒!雖然今晚掛3號波,但39歲嘅卓韻芝同電影美術工作者「閃電俠」梁子賢,冇懼「山竹」,喺中環外國記者會舉行婚禮,「巨星姊妹團」成員有蔡卓妍(阿Sa)、梁詠琪(GiGi)同埋做伴娘嘅鄭秀文(Sammi),阿Sa笑笑口話佢哋係最舒服嘅姊妹,因為婚禮上冇玩新郎環節,Sammi仲話阿芝套婚紗咁靚,唔捨得玩爆佢!

晚上8時點幾,一對新人見傳媒,記者叫佢哋錫錫,但兩人都怕醜,阿芝就話:「唔使啦,唔好呀。」但老公喺眾人要求下,最後借位扮錫面。之後由阿芝一人受訪,佢話:「自己都有上網搵下『山竹』究竟係點嘅植物,原來山竹又叫做夫妻果,所以都相信個颱風會俾我同朋友聚會咗先。」真係打風都打唔甩。

▲晚上8時點幾,一對新人見傳媒,記者叫佢哋錫錫,但兩人都怕醜,但老公喺眾人要求下,最後借位扮錫面。

▲阿芝話山竹又叫做夫妻果,真係打風打唔甩。

▲「巨星姊妹團」成員有蔡卓妍(阿Sa)、梁詠琪(GiGi)同埋做伴娘嘅鄭秀文(Sammi)。

阿Sa又嚟搶花球

至於「巨星姊妹團」做得姊妹,點都要做啲嘢,阿Sa就話可以幫手頂幾杯酒,不過Sammi就話靚酒先飲多啲!做咗人妻嘅GiGi同Sammi,問佢哋有無夫妻相處之道同阿芝分享,Sammi就叫阿芝自己諗,而GiGi就話之前已經分享咗,又讚阿芝今晚最開心同最神彩飛揚!

講到生BB,Sammi就話阿芝開心就得,無咩所謂。阿Sa就俾人話佢係嚟接花球,Sammi就笑叫佢接完要拎返去做乾花,阿Sa就將個波推落祖兒度,話佢都未結婚喎!

▲阿Sa俾人話佢係嚟接花球,Sammi就笑叫佢接完要拎返去做乾花,好搞笑。

▲其實阿芝喺今個月10號已經搞咗中式擺酒,當日阿芝着裙褂出嫁。

10號已經擺酒

其實阿芝喺今個月10號已經搞咗中式擺酒,一班親友當日坐長途機返嚟參加,當日阿芝着裙褂出嫁,俞琤做主婚人之餘仲送酒。當日過大禮同接新娘儀式,新郎同兄弟團嚟到嗰陣,婆婆就掛住同孫女婿傾偈,唔記得叫阿芝出嚟,睇嚟婆婆真係好興奮喎!

▲兩人好襯。

▲當日俞琤做主婚人。

▲孫女結婚,阿芝婆婆好開心。


#GossipGossip#八八通#山竹#卓韻芝#電影美術工作者#閃電俠#梁子賢#巨星姊妹團#蔡卓妍#阿Sa#梁詠琪#GiGi#鄭秀文#Sammi#e+娛樂

相關文章
【迷失銅鑼灣】行錯路搭錯lift 余慕蓮傻豬豬
【恐同事件被圍插】Eric Kwok扯煙同朋友訴苦
單立文又nice又young 點睇都唔似59歲