幻想屯門人與牛為伴 作者Venice:現實好多人有呢個誤解

Thu May 04 2017 08:58:55 GMT+0800 (中國標準時間)

撰文︰Take it e時

屯門係咪有牛?呢個可能係唔少未入過屯門嘅人最初想法,但你望下,一天都係飛機,一街都係電腦,咩年代呀?屯門有冇牛?梗係冇啦,甚至會有屯門人會同你講:「發達過市區㖭呀!」不過最近真係有人構思一系列改圖,幻想喺平行時空下嘅屯門真係有牛,得到好多屯門人嘅共鳴。我哋《E週刊》同原創者做咗專訪,了解下點解會有呢種構思。

▲Venice最初表示唔知咁多人誤解屯門係有牛。

構思呢個改圖系列嘅係大學生Venice(黎素婷),住屯門嘅Venice表示當初因為一個網上熱話,加上功課需要而構思到「屯門與牛」。

當時留意到網上有人討論『要小心屯門嘅90後』,文中形容屯門90後係低等嘅一群,留意有啲屯門人留言好得意,例如自嘲屯門真係有好多牛,所以會次等一啲等等類似留言,我諗會唔會將屯門同牛連結埋一齊,因為好多人覺得屯門係有牛,所以最後將佢哋嘅想法實體化,用相呈現呢個情景。

▲上幾個月有HR媽媽喺網上指責屯門90後係低等嘅一群。

▲Venice形容屋太細,所以居民決定將垃圾房改建為牛棚來養牛。

屯門同牛係咪真係有關係?Venice好坦白咁講:「理解唔到」,因為由頭到尾都未喺屯門見過牛。

屯門人同牛冇關係,因為我出世時已經冇牛,原本唔知咁多人覺得屯門有牛,係上網睇到留言先知,就算唔係住屯門嘅朋友都唔會問我屯門係咪有牛,佢哋誤解冇去到咁嚴重,最多都係問輕鐵開放式閘口會唔會搭霸王車,所以冇諗過原來咁多人會誤解。

▲平行時空下,屯門人會騎牛代步。

對於呢系列嘅改圖得到咁多人共鳴,Venice承認意想不到,亦讚網民提出嘅留言好有趣,令佢打算將來都朝呢個方向,推出唔同系列嘅「平行時空」。

網民提出嘅留言好得意,我亦冇諗過,例如佢哋話騎牛只可以去到屯門公路,之後要轉其他功具,又或者係屯門公路唔係塞車係塞牛。我本身諗住去屯門公路轉車站影,但時間唔夠。我其實好想講一個日常嘅感覺,但呢種日常係唔存在呢個空間,可能係平行時空下嘅屯門先係咁,但現實屯門唔係咁。

▲Venice表示,幻想下嘅屯門屯門到處都係牛,所以牛糞都不少。

▲we go to school by cow!

▲唔少人以為屯門人係靠耕田維生。

▲屯門人習慣養牛!

▲行完商場就騎牛歸家。

圖片授權:Venice

#屯門人#平行時空#牛#返學騎牛#屯門#TakeItE時#熱話

相關文章
沖繩過江龍 $288食150g石垣和牛牛扒
【極誇張!牛丸都打到乒乓波】
跟住食好西 香港十大明星飯堂