營養師真 . 推薦 肥B唔肥媽餐單

Sat Jun 04 2016 14:09:25 GMT+0800 (中國標準時間)

▲Karen第一胎的時候重了30磅,但看起來一點都不肥,手腳依然好纖幼。

撰文︰吳碧欣 攝影︰黄雲慶、晉平安、石鎬鳴

近年娛樂圈掀起一遍生仔熱潮,不少女星懷孕期間頂著大肚照樣可以著泳衣拍寫真,產後身裁不只無走樣,甚至fit過之前,完全打破了女士產後肥胖的不變定律。營養師教路,要做到肥肚不肥身,關鍵是懂得揀合適的食物,不只媽媽陀得開心,BB都會更健康。

▲Karen不只體重輕過未生之前,因為脂肪比率減少了,肌肉都結實了。

有一仔一女的Karen,兩胎都是找營養師控制體重:「當初純粹係為咗自己同BB健康,因為第一胎嘔得好犀利,頭3個月瘦咗5磅,好迷茫唔知應該食啲乜。」Karen自言一向飲食不健康,喜歡吃飯,少肉少菜,亦很少吃水果。看完營養師,才知道每日要攝取足夠的蛋白質、澱粉質和蔬果水果。「為免食得少唔夠營養,懷孕期間我每日要食7份蛋白質,可以揀肉類、魚、豆腐或奶類食品,再加埋飯同蔬果,食量仲多過平時。臨生之前重咗30磅,但全部肥喺個肚度,手腳好幼,又冇水腫,我覺得我身型最靚係大肚嗰陣。」

▲April表示孕婦每日要食2至3份水果,但記緊要分開進食:「如果一次過食一個蘋果、一個橙同一個雪梨,加埋有11茶匙糖,仲肥過飲罐可樂。」

毋須忍口節食

營養師黃麗寶(April)指出,孕婦致肥的原因是飲食無節制,「以為自己唔食BB都要食,結果肥晒晌媽媽度。」她表示孕婦體重增長要視乎懷孕前的BMI(體重指標),「如果本身體重正常,懷孕期間每個月重2磅,生完就唔使點減。」
她強調孕婦控制體重毋須節食,反而要比懷孕前食得更多,才能為BB提供足夠營養。「想肥肚唔肥身,要訣係揀合適嘅食物。以一個體重正常的孕婦為例,每日要食2至3份生果,每餐食1至2碗蔬菜、半碗至1碗飯,而蛋白質不可以低過每日所需的攝取量,方法是將體重(kg)乘0.7再除7,就是所需的份數。」

大肚婆口味會改變,Karen亦不例外,第一胎愛上食薯條,第二胎嗜甜。「有咗BB成日想食薯條,出面買嘅薯條又多油又多鹽,營養師就教我自己整,或者去超市買急凍薯條番屋企焗,健康之餘又頂到癮。」

▲陳慧琳堪稱第一代靚媽,出院時身型fit到令人懷疑她找代母生產。

識得拉上補下

不少人認為,跟營養餐單,除了食之無味,最煩是要控制份量,Karen笑言秘訣其實很簡單:「將食指同中指拍埋,就等於一份肉,唔使用磅。我懷孕期間都冇乜忍口,想食就食,照樣會出街食飯,但盡量唔揀有汁嘅食物,同埋要識得拉上補下。例如食咗麥當勞,下一餐要扣番,食少半碗飯、少啲肉就可以。如果想食糖,就要揀成分天然同冇添加色素,因為好多研究話色素會令小朋友容易有過度活躍症,所以買之前要睇清楚營養標籤。」

她表示兩次懷孕都是重了30磅,孩子出世時有6磅半,健康一切正常,「可能因為攝取咗足夠鈣質,佢哋出世時條腰同條頸好有力,好似3個月大嘅BB咁實淨。尤其係哥哥Dale,7個月大已經識自己企,10個月大先第一次發燒,陀妹妹Amanda嘅時間可能食多咗甜嘢,抵抗力冇哥哥咁好,間中會咳同流鼻水。」
Dale和Amanda現時分別是3歲半和20個月大,Karen亦已成功修身,「因為飲食習慣改變咗,加埋做運動,我而家仲瘦過未生之前,唔只肌肉結實咗,連困擾多年嘅下半身肥胖問題都解決咗。」Karen笑說。

▲Serena說Carsten(左)和Catrina(右)出世是都是重7磅,但自己的體重相差15磅。

兩次懷孕相差15磅

同樣有兩個小朋友的Serena,囝囝Carsten今年4歲,囡囡Catrina 19個月大。「我本身鍾意食零食,陀Carsten嘅時候都冇戒口,反而因為有藉口畀自己食多啲嘢,最終肥咗36磅。到有咗Catrina,我驚再肥落去生完會減得好辛苦,所以決定搵營養師幫手。」
她表示起初都擔心無啖好食,但實行起來原來無想像中困難。「營養師主要係提供飲食貼士,例如唔好食太濃味、太咸同多汁嘅餸菜、雞湯老火湯太多油唔飲得、要食好多菜…因為每餐都食得好飽,所以唔覺辛苦。」

April表示要維持理想磅,控制食量固然重要,但關鍵是要懂得選擇合適的食物和烹調方法。「孕婦暴肥原因係飲太多老火湯,飲2碗仲肥過食一碗飯,尤其係豬骨湯,一碗只得4毫克鈣,反而有好多飽和脂肪,係增加膽固醇同血脂嘅好幫手。而最易出事係紅蘿蔔粟米薯仔湯,因為粟米係澱粉,一條等於三分二碗飯,2粒乒乓波咁大嘅紅蘿蔔相等於1湯匙飯,如果食完飯再食埋啲湯渣就會肥。」

至於一般人以為是健康的食物,例如蒸排骨,佔了六、七成是脂肪;而2塊麵包的鹽分原來多過一包薯片;還有看似清淡的魚蛋米更是孕婦忌吃,因為魚蛋含有防腐劑和鈉,加上湯粉麵鹽分高,會令孕婦容易有水腫。「中國人飲食偏咸,炆餸又落鹽又落糖,其實最肥係啲醬汁,所以出街食飯一定要走醬汁同埋唔好食咁咸,平日煮餸最好用一啲天然調味料,例如薑蔥、蒜蓉、胡椒、果皮或香草等,既健康又可以避免水腫。」

▲Jessica C陀B時堅持每日做40分鐘運動,包括慢跑、瑜伽和游水,又拍攝大肚寫真相留念。

食零食要識揀

對Serena來說,正餐奉行少油少糖少鹽不難,但最難是要放棄至愛的薯片和咖啡。「零食真係好難減,好似我鍾意食薯片,市面上都會搵到啲代替品,一包100卡路里,淨係可以食一包,而咖啡就要走糖同埋用脫脂奶。當然間中都會破戒,試過偷食一、兩次薯片,偷食過一、兩次焗豬扒飯,咁下兩餐就要食少啲。」

比較兩次懷孕的經驗,Serena謂第二胎由於照足指引,攝取足夠營養,健康情況明顯改善了:「減肥都係其次,冇水腫冇抽筋係最大得著。我記得第一胎成日抽筋,水腫好勁,第二胎完全冇試過,個人仲精神咗,冇咁易攰。生之前一共重咗21磅,淨係肥喺個肚度。」
她憶述當初找營養師控制體重,家人都覺得很奇怪,「佢哋以為減肥先要搵營養師,大肚係應該食多啲。結果因為要遷就我食得健康,連佢哋都瘦埋。我老公最明顯,瘦咗10磅,媽咪就瘦咗3、4磅。所以對我嚟講,最大好處係改變埋屋企人嘅飲食習慣,全家人都健康咗。」
Serena以前幾乎一日一咖啡,現在隔個幾星期先會飲一次,還要走糖、用脂肪奶。


#靚媽#陀B#纖體#健康

相關文章
做親都錯 官恩娜水泡圍B頸挨插
3招健胸操
【跟住爸爸去台北】探松山文創園區人氣蜂蜜小店
【孖你做瑜伽】 中級雙人背部伸展
【孖你做瑜伽】 搵個partner幫你輕鬆拉筋

推介文章
《溏心3》搞笑!Bosco細31年做司棋姐細佬
網民同推做視帝 王浩信馬明你揀邊個
大人細路爭住玩室內賽車場
【日本賞楓新角度】 鳥取坐滑雪吊車睇秋色
3招健胸操
【撐小店】希望在明天
鄭丹瑞寸麥美恩:麥明詩十優,你久休!
【孖你做瑜伽】 中級雙人背部伸展
【孖你做瑜伽】 搵個partner幫你輕鬆拉筋
【跟住爸爸食燕窩】唔使一嚿水 燕窩食滿咀
最叻星二代 倫子譚曉風攬女示眾
活在當下 曹永廉
按此閱讀臉書精彩內容

熱爆e+up


載入中…
x