碧咸嫂現身晚宴 名媛場內狂集郵

Sun Mar 20 2016 17:50:04 GMT+0800

撰文︰Take it e時

早前,愛滋病研究基金會 (amfAR) 喺香港舉辦第二屆慈善籌款晚宴。當晚除咗有拍賣籌款之外,仲有向Victoria Beckham頒授特別榮譽獎項,以表揚佢推動全球對抗愛滋病 (AIDS) 所作的卓越貢獻。當日各地嘅紅人紅星,包括Victoria Beckham、楊紫瓊、周迅、關之琳、李玟等等,甚至係社交名人都盛裝打扮出席呢個社交界嘅盛事,唔少藝人喺入面都滿場飛狂集郵,大家就一齊睇下晚宴入面嘅盛況啦。

▲晚會主席何超瓊率領何家二房、三房、四房嘅兄弟姊妹出席,何家上下一齊做慈善,非常溫馨。

▲Victoria Beckham突登嚟到香港出席晚宴,仲着條低胸格仔連身裙大騷身材。

▲咁難得喺香港見到碧咸嫂身影,個個人都想同佢影返張合照,令佢成為全場的焦點。你睇下碧咸嫂個回眸一望幾有味道,殺咗唔少攝影師嘅菲林㗎!

▲何超蓮同刑嘉倩一樣都着deep V鬥身材,刑嘉倩略勝一籌。無計啦,刑嘉倩大緊肚,身材梗係勁啲㗎!

▲楊紫瓊着住半透網裙,露出完美身材,不過就唔見佢未婚夫,紫瓊話大家各有各忙,已經四個禮拜無見過對方。

▲格萊美獎提名的美國騷靈歌手Aloe Blacc為晚宴擔任表演嘉賓。

▲李玟着條紅裙同老公一齊出席晚宴做慈善。

▲李玟着得咁靚咁火辣辣,超蓮都忍唔住搵佢集郵。

▲薛芷倫就專搵型男集郵,好似佢搵咗中田英壽同艾哲倫保迪影相。

▲連黎芷珊都搵艾哲倫保迪合照。艾哲倫保迪都算係當晚嘅被集郵王。

▲周汶錡就好搞笑唔玩集郵,只係搵咗佢老公同佢自拍。

之不過,呢個晚會嘅聯席主席之一劉嘉玲就未見人影啦,反而好姊妹關之琳就有出席。之前就有傳佢哋兩個關係決裂,唔通嘉玲為咗避之之所以唔出席?關之琳接受記者訪問個時,就好似唔多想提咁,只係講「唔係真。」喎。不過呢件事都無影響之之嘅心情,見佢仲滿場飛同人影合照㖭!

▲名媛榮文蔚就搵咗大美人關之琳影相,見之之個時都笑容滿面,心情一啲都無受影響。

▲睇下之之開心到嘟晒嘴同人玩自拍。