群星齊撐毛記分獎典禮 金句、精彩位全面睇

Tue Jan 12 2016 13:21:35 GMT+0800 (中國標準時間)

撰文:Take it e時

「毛記電視第一屆十大勁曲金曲分獎典禮」尋日終於喺真‧伊館上演。聲稱一晚分發超過三千個獎項(好似係),最終於3個鐘入面全部頒晒,而喺全場爆滿、兼Nowtv轉播、以及港九各區公眾廣播下、見證多位真‧歌手,獲得佢哋自己過去一年嘅成果。而網絡亦被網民瘋狂洗版,全城陷入一齊睇電視睇分獎禮嘅熱潮之中!

▲全場「齊鼓掌」!

名人撐場

尋日到場支持嘅知名人士來自「五湖四海」,如劉美娟、彭浩翔、周家怡、健吾、詹志文(Leo)、何韻詩、張祟基、張祟德、河國榮、葉蘊儀、方健儀、盧海鵬等等,而最意外嘅係觀眾席上有「喜氣洋洋」嘅代名詞-徐小鳳,全場有請小鳳姐同時,亦大唱:「熱烈地彈琴熱烈地唱」。

▲葉蘊兒提及二次創作

連環金句

分獎禮都係頒獎禮一種,得獎者當然要把握機會,喺唔會有人催你講快啲、唔會限住你唔俾你講啲咩、但一定要多謝Shell情況下,盡訴心中情,每位真‧歌手都有唔少發人深省嘅金句。
憑《中女羅生門》奪得第九位嘅真‧葉蘊儀,亦喺領獎時提及二次創作:

藝術文化同時代好有關係,因為二次創作同時代有關,亦都反映咗我哋依家嘅香港。

▲方健儀以未殺入樂壇姿態,奪得十大勁曲金曲第四位,以及香港區最受歡迎女歌星獎。

前新聞主播真‧方健儀都有拎兩個大獎,自言眼淺嘅佢,表示得獎後一定唔會喊,但眼泛淚光嘅佢不忘多謝甚為低調、兼有入場支持佢嘅老公;而奪女歌手獎時更有以下心聲:

其實我條路同100毛好似,唔走出第一步係唔知有咁嘅結果。我跳出咗自己嘅comfort zone,你哋都可以。

▲真‧俞琤寄語林日曦要保持「冇大冇細」

到場支持嘅真‧俞琤,亦從《100毛》創辦人林日曦手上接過大紫荊分獎,呢位前商台副主席亦寄語林日曦能保持嗰份「冇大冇細」精神:

其實咩先係真實而恆久呢?或者我會一直保存住呢份冇大冇細,因為現代嘅薪火相傳,要靠良性互動,亦要與時並進,先會歷久常新。

▲河國榮係一個比香港人更愛香港嘅真香港人。

但講到掀起高潮,絕對係連拎兩個大獎嘅真‧河國榮:「多謝香港人,因為你哋對我咁好。」同時亦喺台上感謝到場支持佢嘅太太:「好多謝一直撐咗我好多年、一直照顧我、支持我、忍我嘅太太」其後佢仲寄語年輕人:「試,唔一定唔失敗;唔試就一定失敗。」

多謝香港人,因為你哋對我咁好。

▲盧海鵬現身,台下人大叫試咪。

其他金句:

真‧何韻詩:「無論幾廢,我相信我哋只要繼續做我哋相信嘅事,廢青都可以變一個最好嘅package。」
真‧盧海鵬:「多謝shell,成世有得L。」
真‧張祟基、真‧張祟德:「好多人話我哋低潮,但我哋未上高過。」

彩蛋環節

一個比香港現時頒獎禮更加多人關注同留意嘅「分獎禮」,點會得分獎咁簡單,緊係有唔少彩蛋位,唔知你又有冇留意到呢?

▲林雪未能現身,但睇片一樣精彩。

真。林雪爆粗

曾經有份喺勁曲金曲獻唱嘅林雪,尋日就因為同獎項擦身而過而冇份現身,但毛記亦都喺廣告時間,播出林雪嘅「不得獎」感受。由於林雪訪問內容「極度文雅」,文雅到未能喺直播時播出街,所以只有喺現場觀眾先睇到呢個彩蛋,但呢個世代有咩冇可能?只要一識「上傳」,邊個都忘不了你。

▲Dicksonx葉蘊兒《中女羅生門》

專家Dickson開金口

尋晚Dickson出嚟頒獎已經令全場哄動,其後更憑住《羞家Baby》拎到十大勁曲金曲獎,但貴為愛情投資專家愛情軍事學家Dickson,點會咁簡單?佢喺台上同黃慘盈現場演繹《畀女飛正傳》前傳之餘,亦同喺《中女羅生門》入面同真。葉蘊儀Featuring,大開金口,令全場非常hyper! 

▲主持之一盤菜瑩子笑中有淚、淚中有笑。

主持人東方昇於完場後話「約定大家下年」時,全場觀眾隨即大嗌「紅館」,另一主持人嘅盤菜瑩子亦喺不禁落淚,隨後東方昇亦喺幽默之中帶點感性:「到時我唔希望少咗你哋任何一位,同樣地,亦唔希望少咗我哋任何一位!」最後喺一眾掌聲同煙幕效果下,徐徐落幕。

得獎名單:

第十位 真‧鄭融 
第九位 真‧王宗堯 《胸追人》
第八位 盤菜瑩子 《越癌愈愛》
第七位 真‧葉蘊儀 《中女羅生門》
第六位 真‧張祟基、真‧張祟德 《想搭很難》
第五位 FF的S 《羞家Baby》
第四位 真‧方健儀 《中東與綜》
第三位 真‧何韻詩 《明張目膽》
第二位 真‧陳奐仁 《北韓海闊天空》
曲金曲獎 真‧河國榮 《亞視永恆》
最受GATSBY歡迎廣告歌曲大獎 真‧林海峰 《畀女飛正傳》
大紫荊分獎 真‧俞琤
最受Sheel歡迎廣告歌曲大獎 真‧盧海鵬 《幾好相與》
一台聯頒傳媒大獎 真‧何韻詩
香港區最受歡迎女歌星 真‧方健儀 
香港區最受歡迎男歌星 真‧河國榮

圖片來源:nowtv電視截圖

#毛記電視#勁曲金曲分獎禮#100毛#葉蘊兒#徐小鳳#何韻詩#王宗堯#張祟基#張祟德#盧海鵬#河國榮#俞琤#方健儀#東方昇#黃慘盈#專家dickson#即時

相關文章
推介暑期節目 盤菜瑩子不忘硬sell新書
愈撈愈多瓣 《毛記》計劃拍電影做話劇
真・面目判若兩人 黃慘盈︰唔會因為咁日日化濃妝出街
超高音《真的受傷了》 盤菜瑩子喪呃like
【毛記台慶】嘉賓主播齊晒冷 葉家寶上台力撐100毛

推介文章
當張繼聰係菩薩 Bob:抵佢溝到謝安琪
唐詩詠狠斬2年情 踢洪永城7宗罪
專屬情人 林文龍
撬林耀聲牆腳 方力申暗溝張沛樂
科技融入生活 體驗空間美學
同時溝兩港男 陳展鵬新女友雜食
楊明 把握時機
1O1O呈獻:星星美食旅客 -東京中華料理之最高
聯名買將軍澳樓 蕭正楠黃翠如同居試婚
1O1O呈獻:星星美食旅客 - 兩大貼地必吃餐廳
汪明荃 不言休
1O1O呈獻:星星美食旅客 -食日本好「西」
按此閱讀臉書精彩內容

熱爆e+up


載入中…
x