評選香港三大靈異地區 第三集:銅鑼灣

Sun Apr 10 2016 18:11:46 GMT+0800

撰文︰Take It e時

上兩集講過華富邨同屯門,但咪以為香港得鬼同UFO,原來香港有個好多人好繁榮嘅地方,竟然出現過狐仙傳說,佢就係銅鑼灣!唔好以為多人就唔會有怪事發生呀,除咗狐仙之外,仲有一間百貨公司都曾經傳出有…….

▲皇室堡前身叫溫莎公爵大廈。

溫莎公爵大廈狐仙殺人傳說

事緣喺1981年,當年呢個地方仲未叫「皇室堡/皇室大廈」,而係叫溫莎公爵大廈,當時大廈嘅低層至二樓分內唔同嘅商店,三樓係美心皇宮大酒樓,當時事件就喺酒樓入面發生。

當時有一夫婦喺酒樓幫剛滿一個月大嘅BB擺滿月酒,本來成晚都開開心心一啲事都冇,但係夜晚返到屋企,太太夢見一隻牙尖尖好樣衰嘅狐狸喺床側邊行來行去,狐狸仲衰到挑機:「個地方係我嘅,過嚟擺酒都唔敬老子一杯,即係要我食咗個BB啦!」太太驚醒後嚇醒埋個老公,兩公婆即刻去睇下BB,點知個BB竟然面都青埋,就嚟停止呼吸,送去醫院時已證實死亡。

▲四個角落分別係網上搵到嘅狐仙現形圖,唔知來源,難辨真假;另外中間嗰隻係真.狐狸仔。

事件發生後,太太回想起惡夢入面出現過一塊大理石,即刻搭車返溫莎公爵大廈,竟然見到酒樓外一幅大理石牆上有一個好似狐狸頭咁嘅嘢。

呢件事當年傳媒有廣泛報導,仲有電視台採訪,就連舊電影《大迷信》都有提過。唔,件事真假難証,但係狐仙感覺上好似比鬼堅抽好多,真係見到唔通餵佢食寵物罐頭就冇事咩!

▲你有冇去過八樓?我未去過,真係未去過!

銅鑼灣崇光點解冇八樓

其實呢單嘢,除咗坊間流傳,網上亦有一文字流傳版本,就係話銅鑼灣祟光冇八樓嘅原因,係因為有鬼,話本來八樓係用嚟擺嘢,點知搬晒啲嘢上去,第二日啲嘢竟會自動移晒位…….

崇光百貨曾經帶記者參觀八樓,解釋整件事,話八樓只係「防火層」同埋「員工維修部」......

係啫,咁唔可以証明冇鬼㗎喎。

▲網上流傳嘅文字版本,作者不詳。

估唔到位於鬧市之中嘅銅鑼灣,邪氣比屯門同華富邨有過之而無不及,所以話你班銅鑼灣友,唔好以為英雄主義、疊馬就大晒呀!不過咁,銅鑼灣依家比以前更多人,好似近年真係少咗啲靈異事件喇,會唔會係因為自由行比鬼怪更可怕呢?

部份資料來源:香港網絡大典

#香港奇談#銅鑼灣#皇室堡#Sogo#熱話#TakeItE時

相關文章
【香港奇談】猛鬼地標系列 元朗屏山達德小學
【香港奇談】猛鬼地標系列 灣仔星街紅布
【香港奇談】西貢百慕達 行山行到永遠失蹤?
【香港奇談】猛鬼地標系列 上水警署人頭骨
評選香港三大靈異地區 第一集:華富邨

推介文章
西關大少李家鼎 教你中式餐桌禮儀
5億買《壹週刊》玄機 黃浩寄語《壹》員工:不畏強權撐到底
尹光 三少爺的歌
做機防翻脹 苟芸慧明年嫁陸漢洋
【新加坡米芝蓮:一碟油雞 走出世界】
一人食 鹹蛋蒸肉餅
冒險時刻 C AllStar
星星美食旅客特別番外篇:東京遇上意大利(1)
我們的時光 Twins
狠飛太極Ricky 戴夢夢澳門攬佬
舌戰7女星談情說性 黃浩被阿嬌KO
一個人  湯寶如
按此閱讀臉書精彩內容

熱爆e+up


載入中…
x