買定爆谷! 2016必睇西片逐套捉

Tue Dec 23 2015 12:30:15 GMT+0800 (中國標準時間)

撰文:Take it e時

2016年將會令戲迷非常興奮,好多大片將上映續集同外傳,而且都係大製作,好有可能係電影界吸金嘅一年,影迷最好睇定預告,揀定要睇邊套心水電影。

▲《美國隊長3:英雄內戰》

改編自2006年漫畫《內戰》的故事情節,演員同《復仇者聯盟》一樣大卡士,當然主線係落喺美國隊長同Iron Man身上,因為一項管理超能人士嘅法案而唔妥,仲各自招兵買馬搞對抗。

▲《蝙蝠俠對超人:正義曙光》

唔止美國隊長同Iron Man會鬥過,一直都各有粉絲群嘅蝙蝠俠同超人,都會喺《蝙蝠俠對超人:正義曙光》中打餐死。電影除咗係2013年《超人:鋼鐵英雄》嘅續集。更加係首部超人同蝙蝠俠合作嘅電影。

▲《變種特攻:天啟滅世戰》

2014年嘅《X戰警:未來昔日》玩過穿越,今次《變種特攻:天啟滅世戰》再接再厲,而且時空框架仲跨越幾千年,係《X戰警》史上規模架構最龐大製作。票房分分鐘高過《X戰警:未來昔日》嘅7億美元!

▲《死侍:不死現身》

睇厭咗正義嘅英雄?2016終於出現一個反傳統嘅「英雄」, 以「很黃很暴力」方式追殺仇人,堪稱超級英雄中嘅反面教材。

▲《天煞:地球反擊戰2》

絕對經典嘅外星人入侵地球片,第一集喺1996年上映,續集粉絲等足二十年!預告片入面,仲見到有份演出嘅Angelababy㖭。

▲《非常盜2》

雖然Isla Fisher有BB無法演出《非常盜》續集,但有周杰倫同哈利仔撐場。

▲《怪獸與牠們的產地》

《哈利波特》迷嘅喜訊!喺2016年上映嘅《怪獸與牠們的產地》,係《哈利波特》衍生出嚟嘅故事。 由《霍金:愛的方程式》嘅金像影帝Eddie Redmayne飾演嘅魔法動物學家,跨越五大洲寫出呢本《怪獸與牠們的產地》,後來成為霍格華茲一年級新生必備書,所以電影中係冇哈利、妙麗同榮恩㗎。

▲《憤怒鳥》

冇錯,《憤怒鳥》都出電影版,將會揭開呢群雀仔點解會咁憤怒。

▲《功夫熊貓3》

《功夫熊貓3》上集嘅結尾已經可以見到成為神龍大俠嘅阿波親父,知道自己唔係世上唯一嘅熊貓之際,熊貓村落俾壞人攻擊,阿波要將一堆圓碌碌兼非常溫馴嘅熊貓,訓練成一群「功夫熊貓」。

▲《海底總動員2:尋找多莉》

《海底總動員2:尋找多莉》中嘅多莉係一條冇乜記性嘅藍藻魚,由名主持Ellen DeGeneres配音,《海底總動員》亦係迪士尼一部成功動畫片,不過被《玩具總動員》等爬頭開續集,今次終於到佢喇!

▲《厲陰宅2》

邊個會唔記得《厲陰宅》中嘅驅魔一幕?入面嘅受詛咒娃娃《安娜貝爾》已經以前傳形式,獨立出咗一套電影。《厲陰宅2》將講述1977到1979年間,英國1對小姐妹嘅真實撞鬼事件。