香港靜土系列之靚爆遠足徑 麥理浩徑入選全球20大「夢想之路」

Wed May 04 2016 12:25:00 GMT+0800 (中國標準時間)

撰文︰Take it e時

唔少人成日羨慕外國有好靚嘅大自然景色,但其實喺商場、大廈林立嘅香港,一樣都有靚景。好似日前國家地理頻道(National Geographic)評選全球20條最佳嘅「夢幻(Dream Trails)」遠足徑,大家熟悉嘅麥理浩徑就榜上有名,證明香港靚景對比外國絕對唔輸蝕。但其實講到遠足徑,香港又點止一條呢?

麥理浩徑

作為香港最早啟用嘅遠足徑,麥理浩徑橫跨西貢、獅子山、大帽山以至屯門等地,除咗沿途嘅山景同海景,仲可以行埋去萬宜水庫東壩睇六角形岩柱。絕對係睇靚景嘅「夢想之路」!

▲麥理浩徑有成十段,行晒全程一啲都唔易㗎!

▲萬宜水庫東壩,有世界上面積同體積最大的六方柱石群。

▲水塘景一樣靚爆。

衛奕信徑

同麥理浩徑一樣都係以港督命名嘅遠足徑,係全港第二長嘅遠足徑,同樣有十段。其中第五段可以去獅子山郊野公園、順便睇埋望夫石;第七段會途經城門水塘,都係比較多人行嘅路段。

▲梗係要行去望夫石睇下啦~

▲行第一段可以遠眺陽明山莊。

港島徑

港島徑有八段,頭四段相對容易行,仲可以踩晒山頂、盧吉道同薄扶林水塘等景點㖭。最靚嘅景當然係維港海景啦,會展中心、西九龍文娛區同昂船洲大橋一目了然,見過之後絕對難忘!而其中大潭水塘段亦係熱門嘅一段,唔少人都會專登去影靚相㗎。

▲大潭水塘段影相一流。

▲部份路段以棧道方式設計嘅盧吉道,同一時間只可以通過幾個人。

▲城市全景冇得輸!

鳳凰徑

座落喺大嶼山嘅鳳凰徑,有成十二段咁多。其中第三段跨越香港第二高峯鳳凰山,絕對係攝影嘅好去處,而第九段嘅石壁水塘段,亦係唔少攝影發燒友影相嘅熱門景點。

▲石壁水塘係必到景點。

▲鳳凰徑入面嘅金山家樂徑段。