Sweet爆2015 藝人結婚認愛全紀錄

Thu Dec 31 2015 20:20:36 GMT+0800 (中國標準時間)

撰文:Take it e時

2015年一定係個好年喇,因為圈中有唔少男男女女都結咗婚,又或者公開咗戀情,而傷咗嘅粉絲心真係維園都企唔晒呀,不過而家係自由戀愛嘅時代,拍拖又使乜偷偷摸摸呢?喺新一年應該期望你嘅偶像甜甜蜜蜜,唔好再有咁多賤男或賤男2.0出現啦!

▲今年9月《第三種愛情》喺北京嘅發布會上,兩個人做出《鐵達尼號》嘅經典動作。

宋承憲同劉亦菲,因為《第三種愛情》呢部戲,成就咗一段跨國愛情,女方比男方細11年,宋承憲同好多韓國女演員合作都傳緋聞,包括崔智友、宋慧喬、金泰熙等,其中佢同崔智友更多次離離合合。唔知佢係咪仲咁花心呢?

▲何潤東同女友Peggy嘅緋聞傳咗8年。

教主何潤東靚仔又大隻,不過今年都被人俘擄咗喇!突然於微博公開曬愛,上載同女友嘅拖手照,應該都係結婚嘅節奏。

▲聽到香香拍拖嘅消息,巴打高呼:處女黨解散啦!

岑麗香被傳媒影到同一男子車廂激吻,香香之後直認拍拖半年,對方住加拿大,叫「阿強」喎!總之一眾巴打就心碎啦。

▲車要慢~慢~開呢張相,曾經引發咗一陣抽水潮。

有人被偷拍所以公開,都有人係自己公開嘅,要數今年公開戀情震驚之冠,都係郭富城同方媛㗎喇,喺機場上演一幕英雄救美,再喺微博上載拖手相,兩人年齡差成23年,身份地位又懸殊,係街坊茶餘飯後嘅話題,今年嘅經典!

▲郭富城同嫩模拍拖,好彩熊黛林都好幸福!

喺郭富城張「慢~慢~開」相上載後1日,舊愛熊黛林都同樣喺微博上載同男友郭可頌着情侶鞋嘅相,仲俾傳媒影到熊黛林同郭家一齊去旅行,睇個勢好可能快過郭富城結婚!

▲其實男神們人到中年,去到一個點,都會想定落嚟呢?

《被偷走的那五年》中深情男人嘅形象,張考全都喺社交專頁公開同27歲女友Vicky嘅慶生相,因為傷盡女性粉絲引起討論,張考全兩日後再留言話同女友確實係以結婚為前提交往緊,叫大家唔好有太多猜測。再一刀插入女性粉絲心中。

▲霸氣嘅女人遇到對的人,好可能會變成另一個極端──小鳥依人!唔知冰冰嗲起上嚟係點嘅呢?

范冰冰於紅地氈上用花仙子look打敗張馨予個大媽棉襖look,唔止呀,仲抱得美男歸。佢同內地演員李晨拍《武則天》拍出愛火花,及後於微博上載合照仲甜絲絲互相標籤對方,留言「我們」,打算一齊接受大眾祝福,仲包括兩人嘅舊愛「我們」張馨予同李治廷。

▲兩兄弟又會同時拍拖,其實係咪玩緊公子哥兒啲「鬥快追到女仔」遊戲?

何家四房仔何猷君同何猷亨同一時間,趕及喺2015年封盤,猷君喺IG擺咗張同新加坡首富林榮福之女Kimmy嘅合照,叫女友做公主仲留言「put my ring on it」。猷亨就情歸新宅男女神陳瀅,兩個拍拖斷正被影到,之後被發現早前喺札幌過白色聖誕,男方被記者查詢時先認拍拖,比較低調。

▲陳國峰同陳明恩都好快會同各自嘅圈外另一半結婚。

而宣布即將結婚嘅有陳國峰同陳明恩,陳國峰喺節目中直言咁多年來委屈咗女友,要報答佢。「鬼妹」陳明恩原來同男友Eddy拍拖好多年,形容未婚夫喺各方面都係好好好好男人。

▲胡杏兒公開戀情到結婚,都未夠一年。

胡杏兒同李乘德(阿Phil)啱啱結婚,佢哋拍拖嗰陣,Phil曾被發現趁杏兒喺內地拍劇時去夜蒲,不過杏兒就話絕對信男友,成就一場盛大嘅婚禮。

▲「負皮王」梁烈唯同拍拖11年嘅女友Tina(駱保雯)結婚。

其實唯唯同老婆喺2014年1月已經簽咗紙,老婆等足一年幾先等到補擺喜酒。

▲世紀婚禮嘅風光背後,用咗嘅係天文數字。

黃曉明同Angelababy個世紀婚禮,強大到外媒都有報道,點解?baby着嘅係Dior高級訂製婚紗,婚戒有5.53卡,呢兩樣已經係普通人幾年人工。

▲周董同昆凌婚禮地點超夢幻,教堂係當地著名旅遊景點。

周董同昆凌嘅結婚好似最近發生,其實已經差唔多一年,今年1月佢哋喺英國一教堂舉行婚禮。

▲王菀之都不再單身。

同「Figure王」Eric有情人終成眷屬,光棍節喺微博話「遇上你,太感恩,不遲亦不早」。


#2015#藝人#結婚#推介#熱話#即時

相關文章